ಕುಮಟೆಯ ಹನಿಗಳು

ಕುಮಟೆಯ ಕವನಗಳು..

-೧-

ಕರಿಕಾಳ ಅಮ್ಮನವರಿಗೆ

ಹರಕೆ ಹೊತ್ತ

ಆ ಹುಡುಗಿಯ

ಮನಸ್ಸಲ್ಲೇನಿದ್ದೀತು,,,

ತನಗೊಂದು ಒಳ್ಳೇ ವರ,

ಅಣ್ಣನಿಗೊಂದು ದಕ್ಕದ ಕೆಲಸ,

ತಮ್ಮನಿಗೆ ಮೆಡಿಕಲ್ಲು ಸೀಟು,

ಅಮ್ಮನ ಆಪರೇಷನ್ನಿಗೊಂದಿಷ್ಟು ದುಡ್ಡು

ಅಥವಾ

ನಮೆಯುತ್ತಾ ನರಳುತ್ತಿರುವ ಅಪ್ಪನಿಗೆ

ಮುಕ್ತಿ...

-೨-

ಮಾರಲಿಕ್ಕಿಟ್ಟ

ಬಂಗ್ಡೆ, ತಾರ್ಲಿ, ಫೇಡೆ, ಪಾಂಪ್ಲೀಟುಗಳ

ಸಾಲಲ್ಲಿ ಕುಂತ

ಒಬ್ಬ ಹರಿಕಾಂತರ ಪೋರ...

-೩-

ಅಘನಾಶಿನಿ, ಮಾಸೂರು

ಬೊಗರಿಬೈಲು, ಮುರೂರು

ಹೆಗಡೆ, ಕೂಜಳ್ಳಿ

ಬಸ್ಸುಗಳನ್ನೆಲ್ಲಾ

ಹತ್ತಿಳಿದು

ಒಂದು ಅಯ್ಸ್ ಕ್ಯಾಂಡಿಯಾದರೂ

ವ್ಯಾಪಾರವಾಗಿ

ಕಾಸು ಸಿಗಲಿ

ಎಂದು ಕಾತರಿಸುವ

ಬೊಕ್ಕೆಯೆದ್ದ ಪಾದದ

ಬರಿಗಾಲ

ಕರಿ ಹುಡುಗ...

-೪-

ಕುಟ ಕುಟಿ ಲೂನಾ ಏರಿ

ಪ್ರತಿದಿನ

ಕುಮಟೆಗೆ ಬರುವ

ಅಜ್ಜನ ಕೈ ಚೀಲದಲ್ಲಿದ್ದಿದ್ದು

ಮೊಮ್ಮಕ್ಕಳಿಗೆಂದು ಕೊಂಡ

ಲಿಂಬೆ ಹುಳಿ ಪೆಪ್ಪರಮಿಂಟು

ಮತ್ತು

ಕರಗುತ್ತಿರುವ

ಕುಮಟೆ ಸ್ಪೇಷಲ್ ಗಡಬಡ್...

-೫-

ಕಡಲ ಒಡನಾಟದಿಂದ ದೂರವಿದ್ದೂ

ಕಡಲ ಕುಮಟೆಯನ್ನೇ

ಕನಸಿಸುವ

ಕುಮಟೆಯ ಕೂಸು

ಈ ಸಾಗರಿ...